1994 World Cup lai khan ka pu, ka nu cousin Pu Jonah (Vartian neitupa) hian World Cup fixture leh thlirlawkna hi a bu in a siam a, chu chu ka u nen inhlawh nan kan hmang a kan zuar thin a. Naupan tet atanga football tui ka nih avangin World Cup pawh chu thenawm te inah an TV on chang changin kan va en ve thin a. Inkhel kan enna thin te khan Italy an tan em em a, kei in Brazil ka tan si, a tawp ah final ah an la intum zui! Chutah Brazil penalty ah an chak hlauh. Mahse duh angin kan celebrate ngam lova, kan en na thin te khan min velh kan hlau bawk si. Ka thianpa, in neitu te fapa Italy tan lutuk an chak leh si lo chu a tap vak nghe nghe. Hemi kum World Cup atang hian ka hmangaih em em ARSENAL F.C chu ka lo hmelhriat tan ta.
Italy leh Republic of Ireland an intum a, an en thap a. Chutah chuan Ireland lamah midfielder Eddie McGoldrick tih hi a awm a. An club khelhna te an han sawi a, chutah chuan Arsenal tih hi an rawn sawi ta! Ka beng a verh nghal chat mai. Nalh hi ka ti em em mai a, Ireland pawh chu ka tan phah ta a. Ireland lah chuan Italy chu an hneh hlauh lehnghal a. Ka rilruah Arsenal tih mawlh chu a cham reng. England a Club pakhat a ni tih chu ka hria a, mahse chu mi bak chu Arsenal F.C chanchin engmah ka hre lo. Ka tan nghal bur hi a ni mai.
Premier League 1994-95 season chu en ngei ka tum ta. Arsenal inkhel mawlh chu ka en chak a, engamah hma chuan ka tan em em ringawt a. Mahse mahni in a TV nei ta lo chu chuti mai chuan a en theih bawk si lo. Vanneihthlak takin Manchester City nen an inkhel kan en fuh ta hlauh mai. 3-0 in Arsenal chu an chak a, engamah hma in ka lawm nghal hle a. An keeper hmuihmul nei chhap mai Seaman chu pa hi kan ti em em mai khawp a, tin, striker Wright leh Dickov te chu ka ngaisang nghal hle. Regular a en thei lo ta na na na chu kan tawng pawng tan nghal ringawt a. An history leh tute nge an player te pawh hre mumal lo chuan ’94 kum atang chuan Gooner ruh tak ka lo ni ta der mai!
School te kan han kal a, Arsenal chu sipai ten an ralthuam te dahthatna hmun a ni tih te kan han zir chhova, Arsenal tih ringawt pawh chu pa hliah hliah hian ka hria a. A kohhran ang zawng pawhin Sipai Pawl kan lo ni bawk si, midang zawng ai hian inhmeh bik hian ka inhria a, ka nghet nghal bur mai a. Mahse regular a an inkhel kan en thei loh avangin han sawi tur em em pawh chu kan hre ngai chuang lo. 1994-95 season chu an zo a, kan hriat theih chu 12na an ni tih chu a ni leh tawp. Ka player hmelhriat ve chhun te chu Seaman, Adams, Schwarz, Merson, Dickov, Wright leh Eddie McGoldrick te kha an ni tawp mai a, McGoldrick tih loh hi chu an hmingpum pawh ka hre chuang lo. First 11 ho hming takngial pawh hre kim lo chuan Arsenal F.C chu ka tan nghal bur tihna a nih ber chu.
Mahni t-shirt velah te mahni thiam ang tawk tawkin kan han ziak rang ve a, thian thenkhat in enge Arsenal F.C chu tih pawh hre hawt lo chuan ka chhut vangin an lo chhu ve leh ringawt a. Tun thleng hian an la Gooner ruh ve hle a, a lo tha phian a. Hmun hrang hrangah kan pem kual a, thingtlang ah daih te kan han awm leh lawp lawp a, TV en theih loh na hmun ah te kan awm avangin kum pumhlum deuhthaw TV en mumal lo ten kan han awm leh a. 1996 alo ni a, Aizawl ah ka pa an sawn ta hlauh mai. Keini ang tan chuan inkhel en chance a ni ta. Ka lawm hle a. Regular lutuk pawhin kan en thei chuang lo, mahse thlakhat a vawi khat en theih ringawt te pawh kan lawm hle a. 1996 kum hian Arsenal chuan manager thar an nei tih kan hria , chutih lai chuan Manager leh Coach pawh kan hre hrang lo. Arsenal manager thar chu Arsene Wenger a ni tih ka han hriat chuan Arsene tih lai chuan a ti Arsenal hle in ka hria a, Arsenal tih leh Arsene tih chu a inang bawk sia, a inhmeh hi ka ti hle mai. Arsenal ti Arsenal tu niin Arsene Wenger chu ka hria a, a mimal tak pawh in ka tan hle a ni.
Kum 17 chhung Arsenal ka tan tawh chhung hian player ropui tak tak leh tha tak tak te kan club ah hian an lo khel tawh thin a. An inkhel hi a English game lo hle a, passing an thiam in tunhma deuh te phei kha chuan khawvela counter attack thiam leh na ber team te pawh an lo ti thin a. Kan undefeated season phei kha chu kei ni ang chuan engtikah mah kan theihnghilh tawh lovang. Arsenal ka tan chhung zawnga ka hun tawn tawh ropui ber a ni. Arsenal ka tan em avang hian ka best friend nen pawh kan insual lek lek zel a, a ni Manchester United supporter alo ni khanglang bawk nen. Thian dang te leh hmelhriat thenkhat te nen pawh Arsenal ka tan luat tuk vang hian han in paih nawk nawk chang kan ngah thei khawp mai. Tin, ka tan em avang hian ka Gooner pui kan club chetchhiat changa sawisel vak mai chi te hi ka ngaithei lo hle a, thin in a tawrh loh chang te hi a awm ve leh zeuh zel. Thinchhiat an reh deuh hnu pawh hian insum har deuh chang hi a awm leh thut zel.
Season 6 ngawt mai han nil chu thil hrehawm tak ani ngei mai keini ang tan chuan! Mahse ‘Once Gooner, always a Gooner’ tih hi ka thupui a nih avangin engang pawhin kan club an chechhia a ni emaw, an che tha emaw ka tan reng dawn a, tin, ka tan em avang hian ka sawisel ve phal thlawt lo han thinrim deuh chang pawh hian. Kan tan ta sa sa a, thih thlengin rinawm in kan awm ang chu le.
A kuhmum hi a par chhuak tep tawh a nia. Ka Gooner pui te zawng zawng kha i nghak hram hram ang u. I LOVE MY ARSENAL AND GOONER TILL I DIE.
arsenalmizoram 