June 1, 2011-12 season atang khan Uefa chuan Financial Fair Play (FFP) chu a hmang tan ta. Tunlai European football a player te hlawh leh transfer fee a sum chelek nasat lutuk avanga rulh sen hleih theih loh khawp a leiba ngah club tam tak te an lo awm tak avang te, club neitu hausa tak tak ten club a sum tam tak an pawngpaw chhun luh thin khap daih nan leh Europe club hrang hrang te an in khai rual theih zawkna a nih beisei in FFP hi chhawp chhuah a ni. Uefa chuan FFP ti hlawhtling tur hian Jean-Luc Dehaene, former Prime Minister of Belgium kaihhruaina hnuai ah Club Financial Control Panel chu club hrang hrang te account en dik tur leh a tul anga action la turin a din nghal bawk.
FFP concept in a tum ber chu “break-even” tih a ni a, sum lakluh atang chauh a sum hman chhuah tiin a sawi theih mai awm e. Tun atang chuan club te hian TV rights, gate receipts, competition prize money leh sponsorship atanga pawisa an hmuh chiah an club staff te hlawh atan leh player lei nan leh an hlawh pek nan an hmang thei tawh ang a. Youth development, stadium infrastructure leh community development a sum hman te erawh FFP hian a huam tel lo. Tin, transfer fee hi club te hian an account ah player contract chhung hian an sem zai thin avangin transfer fee zawng zawng kha annual expense ah a lang vek lo thin. Entir nan, Torres hi Chelsea khan £50m in lei mahse, a za vai hian Chelsea 2011-12 account ah a lang lovang a. Kum 5 leh a chanve (a contract length) chhung in kum tin £9m (£50m fee divided by 5.5 years ) leh a kum khat hlawh zat (£8m vel anga chhut) angin a lang zawk dawn a ni i.e. £17m per year.
FFP hmang hian club te hi 2011-12 leh 2012-13 season zawh ah a vawi khat nan en dik an ni ang a. 2011/12 atanga 2013/14 chhung hian €45 million (£39.5m) aia tam loss an nei tur a ni lova. Amaherawhchu, an loss hi kum dang aia a hniam emaw 2010 hmaa transfer fee leh player hlawh an lo tih fel tawh te avanga overspend an nih chuan €45 million aia tam loss pawh ni mahse ngaihhnathiam theih an ni ang. 2014/15 atanga 2017/18 erawh hi chuan khauh takin €30m (£26.3m) chauh loss an neih phal a ni tawh ang a. Hemi hnu lamah chuan Uefa hian club te chu sum lama thiam taka mahni in enkawl a “break-even” turin a beisei tawh a ni. Hetianga leiba ngah lutuk leh lakluh aia tam hmang fo thin te chu Uefa in competition a buatsaih (Champions League, Europa League etc.) ah tel ve phalsak an ni dawn lo a ni.
2011-12 leh 2012-13 accounts te hi en dik an nih hnu ah 2013/14 season atang hian FFP rules zawm lo club te chung ah action hmasa ber lak theih a ni ang a. 2014-15 season ah chung club te chu Uefa competition ah tel phalsak an ni lovang.
Uefa hian hetia sum in football a ti bawrhbang ta lutuk thenfai leh nan a hma a la hi fak a hlawh em em a. Nimahsela, mi tam tak chuan club lian te hian FFP rules and regulations siam te hi thiam taka relhruk theihna kawng an zawn chhuah mai theih ring an tam hle a. Tin, dan hi an zawm si loh chuan Uefa hian Champions League leh Europa League ah te a tel loh tir ngam tak tak ring lo an tam hle.
Heng zawhna te hi chhangin Gianni Infantino, Uefa general secretary chuan “Mi zawng zawngin rules hi an hre vek a kan kal tlangpui ngei ang. Bul kan tan tawh a, sut leh theih a ni lo” tiin a sawi. Uefa hian club te hi hriatthiamna chin an nei ang an ti a, amawherawhchu hei hi an chak lohna a ngaih ngawt tur a ni lova. Tun kum 5 kal ta chhung ringawt pawh khan club 27 lai chu ‘club licensing criteria’ an tih hlawhtlin loh avangin European competition a tel thei lo turin an lo hrem tawh a ni. Club te nau mai mai an hrem lova, tun season kal ta a La Liga a 5th position Mallorca pawh sum lama an inrelbawl dan a dik loh avangin tun kum Europa League ah telh an ni lo.
Heti chung hian Manchester City chuan an club neitu company vek te hmangin sponsorhip ang a kalin sum lak luh vak mai an tum niin a la lang cheu mai a. Hemi chungchang ah hian Infantino chuan “Tumahin vervek takin kan dan siam te hi pehhel an tum tur a ni lo. Club Financial Control Panel in kan dan siam te kal hel tum an awm a thil dik lo a awm ni a an hriat chuan, dan bawhchhiatna tho a ni” tiin a sawi.
Engpawh ni se, tunah chuan engtiang chiaha khauh in nge Uefa hian Financial Fair Play hi a kalpui dawn tih hriatthiam a la harsa a. Club lian te hian zawm an tum tak tak ang nge, sum tam zawk an hai luh theih nan Uefa atanga in la hrangin anmahni pualin European Super League din an tum mai ang tih te hi i lo thlir phawt mai teh ang.
arsenalmizoram 