Arsenal sawi loh Football hrim hrim ka lo en tlai lutuk hi ka inchhir fo thin. U te’n an ngaihnep avangin football hi kan ngainep ve ringawt a, ‘savun hampuar patlingin inchuh luih luih’ kan ti a kan hmusit thei khawp mai. A khelh pawh ka khel tam vak lo, goalkeeper-ah chuan ka tang ve thin. Kan veng ah cricket a rawn lar a kan khel chho ta zawk a. AC Milan jersey chu nei ve bawk mah ila football tui na khan min man pha lo hrim hrim. Ka u T-shirt a Henry lem lah tunge a nih hre ta lo chu ‘zawng lian’ kan ti mai a. Man Utd leh David Beckham hi kan hre bel ve hlur ringot a ni mai, ka lo ngei ve em em tawp a.
2004 atang chuan ka en ve tan ta, ka en tan dan pawh ka hre lo. Arsenal leh France kha ka tan nghal em em ringawt mai a. Mahse Invincibles team kha ka hre ve hman miah lo tih hi insit tak chungin ka’n zep tel hram ang e. Euro kha chu ka en hman a, England leh France inkhelh tuma Zidane stoppage time goal kha chu ka la hre chiang khawp mai. Match 49 hneh loh nei loa kan kal hnua Rooney dive, referee Mike Riley-a’n penalty a pek vanga kan chak loh te kha ka la hre chiang. Season tawpa FA Cup kan lak bak kha chu Gooner ka nih hnu hian eng trophy mah kan chawi leh tawh lo.
Vieira chhuah hnu a Fabregas rawn tha chho nghal lutuk kha ka hmuhnom tih ber a nia. Fabregas kha chu ka be lo chauh a ni ber mai. Ka favourite player thin Cashley Cole a’n min chhuahsan te kha ka la na em em. Class 10 kan nih laia nitin kan class football debate kha a ngaihawm thei khawp mai. A hre ber nih in chuh khan a inkhelh mai poh duhtawk loin an sawikhawmna zawng zawng kan en leh vek a. Kan class ah Arsenal fans kha tam zawk mah ila Man Utd fan hnial hrat zet pakhat hi kan hnial hneh lo fo thin. Arsenal tan kan campaign thin bawk a, tlem azawng kha chu Arsenal kan tan tir hial. Dawhkan leh bang ah Arsenal players hming kan ziak rang nasa thei khawp mai.
Arsenal hian kum 7 chhung chu football hmuhnawm tak min lo entir ta a. Arsenal vang hian thian tha tak2 ka lo siam tawh thin bawk. Khawvel zau zawk min thlir tir tu a ni a, ka zirlai tan pawh hian a tangkaiin ka hre hial thin. A khelh lam thiam lo mah ila a en lam hi chu ka thiam zawng tak a ni a, ka dam chhung hian ka chawlhsan ka ring lo, football leh a bikin Arsenal en hi. King Henry thusawi hian ka han khar mai ang e: “Once a Gooner,always a Gooner”
arsenalmizoram 
‘Once a gooner always a gooner ‘:*